राष्ट्रकवि माधव घिमिरे विशेषाङ्क ‘अनेसास दर्पण’ सार्वजनिक
अन्तर्राष्ट्रिय नेपाली साहित्यसमाजको त्रैमासिक प्रकाशन ‘अनेसास दर्पण’को राष्ट्रकवि विशेषाङ्क शनिबार लोकार्पित भएको छ । सन् २०१४ देखि डिजिटल पत्रिकाको रुपमा प्रकाशन हुँदैआएको दर्पण पहिलो पटक ‘हार्डकपी’का रुपमा प्रकाशन गरिएको हो ।
लोकार्पण कार्यक्रमका प्रमुख अतिथि तथा अनेसासका संस्थापक अध्यक्ष होमनाथ सुवेदीले अनेसासका क्रियाकलापलाई विश्वसामु राख्न दर्पणले महत्वपूर्ण भूमिका खेल्ने बताउँदै अनेसासको ऐतिहासिकताबारे प्रकाश पार्नुभएको थियो ।
कार्यक्रममा अनेसास बिओटीका सल्लाहकार प्राडा खगेन्द्रप्रसाद लुइटेल, डा. रामप्रसाद ज्ञवाली, डा हरि कोइराला, ज्योति पौडेलसहित अनेसास बीओटीका उपसभापति पदम विश्वकर्मा, अनेसासका वरिष्ठ उपाध्यक्ष गोवर्ध्दन पूजा ,महासचिव सर्वज्ञ वाग्ले, दर्पणका प्रधान सम्पादक लालगोपाल सुवेदी, कार्यकारी सम्पादक हरि काफ्ले ‘शैव’लगायतले मन्तव्य व्यक्त गरे ।
अनेसासका अध्यक्ष प्रकाश पौडेल माइलाको सभापतित्वमा आयोजित उक्त कार्यक्रममा कविहरू तीर्थराज अधिकारी, राम लामा ‘अविनाशी’, राजेन्द्र श्रेष्ठ, रवीन्द्रभक्त श्रेष्ठ, लतिता दोषी, पुष्पा खनाल, सुदीपभद्र खनाल लगायतले कविता वाचन गरेका थिए ।
