अनेसासलाई 'अनेसास' नै बनाउने अभियान

‍- गोवर्द्धन पूजा

# मनमा नेपाली भाषा र मुटुमा नेपाली साहित्य साँच्नेहरूको साझा घर हो -अन्तर्राष्ट्रिय नेपाली साहित्य समाज । आँखामा परदेशको छाया र सम्झनामा घरदेशको माया बोक्नेहरूको रहर हो-अन्तर्राष्ट्रिय नेपाली साहित्य समाज  । हो, यो प्रवासी र घरवासी नेपाली भाषीको नित्य कर्मको मन्दिर अनि सन्तान दरसन्तानलाई जोडने मुटुको ढुकढुकी !
# भाषाले जोडिएका छौँ -हामी , र साहित्यले सिँगारिएका छौँ । बोली नेपाली नहुँदो हो त कति निरस हुन्थ्यो होला आप्रवासको बसाई ! हो यही कडीका कारण भूगोलको कुनाकुनामा सानो नेपाल भेटेको अनुभूति हुन्छ , जसको कारण बन्न सक्छ , सकेको छ र सक्ने छ -अन्तर्राष्ट्रिय नेपाली साहित्य समाजको छत्र-छायाँ ।
# सबै संघसंस्थाको आ-आफ्नै महत्व र अस्तित्व छ। सम्मान गर्नुपर्छ -सम्मान लिन चाहनेले । हामी अनेसास परिवार सबैको सह-अस्तित्वको सम्मान गर्छौ र सम्मान चाहन्छौँ -अरुबाट पनि । यसैले हाम्रो लोलीबोली एउटै छ- अनेसासलाई अनेसास नै बनाउनु पर्छ ।
# नेपाली साहित्यलाई विश्वव्यापीकरण गर्नु हिजोको आवश्यकता थियो , आज ढिलो भइसकेको छ । अझै पनि केही गरेनौँ भने भोलिले हामीलाई क्षमा दिँदैन । वर्तमान पुस्ताले भोलिको पुस्तालाई केही दिन सक्ने सम्पत्ति भनेकै भाषा पनि हो , जो पैसामा तुलना हुँदैन । किन्न चाहेर पनि समयको छलले दिदैन , दिन्छ त केवल पछुतोको तुष मात्र । त्यसैले हामी अमूल्य सम्पत्ति पुस्तान्तरणको चरणमा पनि छौँ । सकेको दिने र नसके पनि प्रयास जारी राखिरहने अभ्यासमा । अनेसासमा हामी त्यो प्रयासी जोश र जाँगर छ ।
# नेतृत्वमा आउनु वा नेतृत्व गर्न चाहनु भनेको रहर मात्र बन्नु हुदैन । यो एउटा अवसर र केही गर्ने चुनौति पनि हो । हिजो जे राम्रो भयो, सन्तोष मान्नु पर्छ तर आज केही गरेर भोलिसम्मका लागि केही राम्रो गर्न सक्नु नेतृत्व लिनेको लागि कडा चुनौति हो । अनेसासमा राम्रा मान्छेहरू आए , उनीहरूको असल कार्यका कारण अनेसास आजको अवस्थासम्म आएको हो । अब अझ अघि बढाउने अवसर हाम्रो हातमा आएको छ ।
# हामी केही गर्न आएका हौँ र गर्ने प्रतिवद्धता व्यक्त गर्नुभन्दा काम गर्नु आजको आवश्यकता हो ।
समय साक्षी राखेर केही गर्नेछौँ - संस्थाको हित र विधानलाई शीरमा राखेर ।
आउनुहोस् - हामी सारथि बनेर आएका छौँ - अनेसासको वर्तमानको यात्रामा  सहयात्री बनौँ । समुद्रभित्र समाहित असंख्य थोपाहरूजस्तै । सह-अस्तित्वको एकाकार रुप र शक्तिले हामीलाई अनेसासका पुजारी नै देख्न सकौँ ।

#  राम्रा कार्यको निरन्तरता र अझ राम्रा लाग्ने कामको सुरूआत गर्ने योजना हामीसँग छ ।
त्यसैले -

* आजीवन सदस्यहरूलाई परिचयपत्र दिनु, गतिविघिहरूको सूचना प्रवाह गर्नु, नियमित सम्पर्क र सम्वन्ध स्थापना गर्नुजस्ता सामान्य काम मात्र गर्न सके पनि हामी खुशी हुनेछौँ ।

* तोकिएको शुल्क तिरेर आजीवन सदस्यता लिएका परिवारका सदस्यले निर्वाचनका बेला मताधिकार प्रयोग गर्नबाट वञ्चित हुनु नपरोस् भन्ने हाम्रो ठूलो चाहना छ , हामी केही गर्छौँ , पक्कै गर्छौँ ।

* मन मिल्ने संघ संस्थासंग सहयात्रा गर्नु हाम्रो संस्कार हो । हाम्रा च्याप्टर र ट्रस्टीसँगको सुमधुर सम्बन्ध स्थापनार्थ कुनै कसर बाँकी नराख्नु हाम्रो धर्म हो । साहित्यिक सभा सभासमारोह गर्नु हाम्रो कर्तव्य हो , हामी कर्तव्यवाट टाढा भग्ने छैनौँ ।

* प्रतिभा, अभ्यास र व्युत्पति नै सिर्जनाको परिपक्वता हो । अभ्यासले सिर्जनामा निख्खारता ल्याउनेमा विश्वास गर्छौ। हामी त्यो तर्फ पनि सचेत रहनेछौँ । गुरु ज्ञान गुदबाट चेला चिनी निकाल्न पनि हामी कञ्जुस्याँई गर्ने छैनौँ । उचित समयमा हाम्रो प्रयास सार्वजनिक हुनेछ। बस प्रतीक्षा गर्नु होला ।
अन्त्यमा,
जसको मतका कारण जो-जो नेतृत्वमा आएका छौँ , त्यो मतको सम्मान विर्सनु अपराध मात्र होइन महाअपराध हो । दूधको भाराभन्दा ठूलो जिम्मेवारी सम्झन सक्यौँ भने हामी सफल हुनेँछौँ  । त्यतिबेला कसैलाई भन्ने धन्यवाद र गरिने सम्मान साँच्चीकै सम्मान हुनेछ । र, अनेसासलाई अनेसास नै बनाउने हाम्रो प्रयास सार्थक हुनेछ ।

ईमेलः president.inls@gmail.com

-gpooja1970@gmail.com