अन्तर्राष्ट्रिय नेपाली साहित्य समाज अनेसासको नामले समेत विश्वभरि चिनिन्छ । नेपाली भाषा साहित्य र संस्कृतिको उन्नयनका लागि यसको स्थापना गरिएको हो । नेपालीहरू अरूभन्दा भिन्न देखिने र चिनिने मुख्य आधार भनेकै नेपाली भाषा हो । नेपाली समाजको नालीबेली बुझ्नका लागि साहित्य र संस्कृति नै मुख्य आधार हुन सक्छ । कुनै पनि भाषालाई रसिलो र मीठो बनाउने कार्य साहित्यले गर्दछ । संस्कृतिले कुनै पनि जातिलाई चिनाउन मद्दत गर्दछ । नेपाली समाज कस्तो छ भन्ने बुझ्न नेपाली संस्कृति बुझ्नुपर्दछ । आज नेपाली जाति विश्वभरि छरिएर रहेका छन् । अध्ययन, व्यापार अर्थात रोजगारीका लागि देश छाडेर गएका नेपालीहरूको संख्या नेपालको जनसंख्याको एक तिहाइ छ भन्ने आंकलन गर्न थालिएको छ । यति ठूलो संख्यामा विदेश गएका नेपालीहरू गुमनाम भए भन्ने चिन्ता हरेक प्रवासी नेपालीले गरेको पाइन्छ । यही सत्य,तथ्यलाई मनन गरेर नै अनेसासको जन्म भएको हो । यसको नाममा साहित्य शब्द प्रयोग गरिए पनि यथार्थमा नेपाली भाषा बचाउने यौटा अभियान हो यो । भाषा बॉच्यो भने साहित्य पनि बॉच्छ । भाषामा फूलजस्तै बनेर नेपाली साहित्य फक्रियो भने यसको सुवास चारैतिर छरिन्छ । भाषाले हाम्रो चिनारी बचाउॅछ । साहित्यले हाम्रो समाजलाई सुनजस्तै खारेर चम्किलो बनाउँछ । संस्कृतिले एकता,मेलमिलाप र भाइचाराको मार्ग पहिल्याउन उत्प्रेरित गर्छ । अनेसास प्रवासमा खोलिएको पुरानो संस्था हो । प्रवासी जीवन जिउन संघर्ष गरिरहँदा हाम्रो भाषा,साहित्य र संस्कृति कुनै पनि हालतमा नमरोस्, बरू यो झॉगिएर नयॉ नयॉ पुस्तामा हस्तान्तरित हुन सकोस् भन्ने हामी चाहन्छौ । जसरी मोटर,कार,प्लेन,नचलाईकन वर्षौसम्म थन्क्याइयो भने त्यसमा खिया लाग्छ त्यसरी नै नेपाली भाषा बोल्न र साहित्य सृजना गर्न छोडियो भने पनि अन्त्यमा भाषा खिइँदै विलीन हुने सम्भावना रहन्छ । अनेसासले नेपाली भाषालाई चलायमान र साहित्यलाई गतिशील बनाउन स्थापना कालदेखि नै विविध कार्यक्रम संचालन गर्दै आएको छ । यो संस्था नेपाली मन र नेपाली पनको साझा फुलबारीजस्तै रंगीन र सुवासयुक्त बगैँचा बनेको छ । हामी भाषा,साहित्य र संस्कृतिप्रेमीहरू यो सिंगो घर,ऑगन र फूलबारीका सिकर्मी र डकर्मी जस्तै हौं । विविध कलाले सिंगारेर मन्दिरजस्तै पवित्र साझा घर बनाउने महान् कर्ममा हामी हातेमालो गर्दै जुटेका छौं । नेपाली स्रष्टाका कृतिहरू प्रकाशन गर्ने,उच्चस्तरीय कृति अनुवाद गर्ने,विश्वमा कहलिएका कृतिलाई नेपाली भाषामा अनुवाद गर्ने,भाषा बँचाउने, साहित्यको संवर्द्धन गर्ने, संस्कृतिको जगेर्ना गर्ने कार्यमा हामी कटिबद्ध छौं ।

- सर्वज्ञ वाग्ले अध्यक्ष अन्तर्राष्ट्रिय नेपाली साहित्य समाज केन्द्रीय कार्य समिति

ईमेलः sarbagya11@gmail.com