Member Login

Not a member? Please Apply for Membership

अन्तर्राष्ट्रिय नेपाली साहित्य समाजको बार्षिक साधारण सभा र नवनिर्वाचित पदाधिकारीहरुको सपथ ग्रहण तथा हस्तान्तरण कार्यक्रममा अध्यक्ष पदम विश्वकर्माको मन्तब्य

 

अन्तर्राष्ट्रिय नेपाली साहित्य समाजका आदरणीय आजीवन तथा ट्रष्टी सदस्यज्यूहरु, अनेसासका पूर्व अध्यक्षज्यूहरु, सल्लाहकारज्यूहरु, सम्पूर्ण च्याप्टरका अध्यक्ष एबं पदाधिकारीहरु, उपस्थित साहित्यप्रेमी महानुभावहरु, अनेसासलाई माया गर्ने सम्पूर्ण महानुभावहरु !

    
नेपाली साहित्यको इतिहासमा महत्वपूर्ण योगदान गर्दै आएको अन्तर्राष्ट्रिय नेपाली साहित्य समाज (अनेसास) स्थापनाको २७ बर्ष पूरा गरिसकेको छ । डायस्पोरामा नेपाली भाषा, साहित्य र संस्कृतिको विकास, उन्नयन र विस्तार गर्ने मुख्य उद्देश्य लिएर स्थापित अनेसासले यस अवधिमा संस्थागत विकास, नेपाली भाषासाहित्यलाई डायस्पोरामा विस्तार र नेपाली साहित्यको बिश्वब्यापीकरणमा आफूलाई समर्पण गरेको सर्बबिदितै छ । यसका अतिरिक्त संसारभर छरिएर रहेका सबै साहित्यकारहरुको साझा संस्थाको रुपमा विकसित गर्न उन्मुख रहेको विश्वास दिलाउदै संसारभर जहाँ जहाँ नेपालीहरु रहेपनि ती ती ठाउँहरुमा अनेसासलाई पुर्याउन उद्दत रहने आशा लिएको छु ।

ढेड दशकदेखिको अनेसासमा मेरो संग्लनता अनेसासको कोलोराडो च्याप्टरको संस्थापक सदस्य, अध्यक्ष, केन्द्रीय महासचिव हुँदै दुइकार्यकाल अनेसासको अध्यक्ष बन्ने सौभाग्यका लागि अनेसासका सम्पूर्ण आजीवन तथा ट्रष्टी सदस्यहरु, यसलाई माया गर्ने सबै महानुभावहरुप्रति आभारी छु । यी सबै अबधिमा ममार्फत अनेसासलाई हृदयदेखि माया र सहयोग गर्ने सबै मनहरुमा नमन प्रकट गर्दछु । सबै कार्यकालका कार्यसमितिका पदाधिकारीहरु, सल्लाहकारहरु, अनेसासका पूर्व अध्यक्षज्यूहरु, संस्थापकज्यूहरु, ट्रष्टी सदस्यज्यूहरु, च्याप्टरहरु र च्याप्टरका पदाधिकारीहरु, आजीवन सदस्यहरु, साहित्यकारहरु, निर्वाचन आयोगका पदाधिकारीहरु, मेडिया जगतका पत्रकारहरु, अनेसास र नेपाली साहित्यलाई मायाँ गर्नुहुने सम्पूर्ण महानुभावहरुमा हृदयदेखि नै श्रद्दा अर्पण गर्दछु ।

यसै गरि २०१६ र २०१८ को निर्वाचनमा गहन जिम्मेवारी लिएर निर्वाचन प्रकृया सहज र प्रजातान्त्रिक ढंगले सम्पन्न गराउनु हुने प्रमुख निर्वाचन आयुक्त क्रमश: तिर्थराज पाण्डे र भिम कार्कीज्यू, सदस्यहरु प्रविन भण्डारी, चुडामणि खनाल, मतदाता अध्यबधि समितिका सदस्यहरु, सल्लाहकारहरुलाई हार्दिक धन्यवाद ज्ञापन गर्दछु ।

 

आदरणीय अनेसासका आजीवन तथा ट्रष्टी सदस्यज्यूहरु,  

बिशेष गरि यी चार बर्षको कार्यकालमा अनेसासलाई संसारभर पुर्याउने, अनेसासको संस्थागत विकास गर्ने, बिगतका गतिविधिहरुलाई निरन्तरता दिंदै नयाँ गतिविधिहरुको आरम्भ गर्ने नेपाली साहित्यको विश्वव्यापीकरण गर्न समर्पण रहेको यहाँहरुलाई सर्बविदित छ । ६ वटा अन्तर्राष्ट्रिय सम्मेलनहरु, तिन वटा क्षेत्रीय र राष्ट्रिय सम्मलेनहरु, ८ वटा राष्ट्रियस्तरका सम्मेलनहरु, रजतजयन्ती लगायत ११ वटा केन्द्रीयस्तरका जयन्तीहरु, नेपाली पाठशालाको पाठ्यक्रम तयार, अनेसास रामलामा सर्बोत्कृष्ट च्याप्टर पुरस्कार (पांच सय अमेरिकी डलर सहित), अनेसास रामलामा सर्बोत्कृष्ट पुरस्कार (दुइहजार अमेरिकी डलरसहितको), अनेसास भवन भट्ट विशिष्ट महिला साहित्यकार पुरस्कार (एक हजार अमेरीकी डलरसहितको) र अनेसास दुर्गा दाहाल सर्बोत्कृष्ट पुरस्कार (दुइ हजार एकसय अमेरीकी डलरसहितको) पुरस्कर स्थापना, दुईवटा नवरत्न नारी पुरस्कार स्थापना र आयोजना, लामो समयदेखि अपूर्ण रहेको अनेसासको बिधान संशोधन, अनेसास रेडियो कार्यक्रम, अन्तरदृष्टि (अंक ३८, ३९, ४०/४१ र ४२), अनेसासको इतिहास, उत्तर अमेरिकाली नेपाली साहित्यको इतिहास, सिर्जनामा नारी, नेपालका कालजयी कथाहरु (Timeless stories of Nepal), अनुबाद (र प्रकाशन्मुख) नेपाली क्यालेन्डर प्रकाशन, (२०१५. २०१६ र २०१८), दर्पण (अनलाइन पत्रिका), अनेसासको संक्षिप्त परिचय प्रकाशन, २५ भन्दा बढी च्याप्टरहरुको स्थापना, ८०० भन्दा बढी आजीवन सदस्यहरु र २८ जना ट्रष्टी सदस्यहरु थपिनु, साहित्यकारहरुको सम्मान आदि यस अवधिका मुख्य मुख्य गतिविधिहरु सम्पन्न भए, जुन यहाँहरु सबैका सामु छर्लंग छन् । यस लगायत च्याप्टरहरुका गतिविधिहरुमा रहेको उपस्थितिले च्याप्टरहरुमा अरु हौसला र उर्जा थपिएको यहाँहरु समक्ष छिपेको छैन । यी सबै प्रयासहरुलाई यहाँहरुले नजिकबाट नियालेर विश्लेषण गर्नु हुने नै छ भन्ने पनि पूर्ण विश्वास लिंदै आगामी दिनमा पनि संस्थाको हित, विकास र उन्न्यनमा मेरो संलग्नता रहने यहाँहरुलाई विश्वास दिलाउन चाहन्छु ।  

द्रुततर गतिमा फैलिंदै गएको वर्तमान अनेसासमा सामर्थ्य, सम्भावना, चुनौती र अवसरहरु व्यापक रहेका छन् । झ्यांगिदै गएको अनेसासलाई समय सापेक्ष, सदस्य साहित्यकारहरुको रुचीअनुसार लैजान अबको अनेसासले निम्नलिखित कार्यहरु संचालन गर्न उपयुक्त ठानेको

छु :

  • अनेसासको वर्तमान विधानमा समयानुकुल संशोधन गर्ने
  • अनेसासको दीर्घकालीन र अल्पकालीन योजना तर्जुमा गर्ने र सो अनुरुप कार्य गर्दै जाने
  • च्याप्टरहरुसंग घनिष्ट सम्बन्ध कायम गर्दै नयाँ च्याप्टरको स्थापना, निस्क्रिय च्याप्टरहरुको पुनर्गठन
  • आजीवन सदस्यहरुको विवरण अध्याबधि गर्ने र आजीवन सदस्यहरुको विवरण प्रकाशन गर्ने
  • सबै साहित्यकारहरुलाई समेट्न सन्जालको विकास गर्ने
  • अनुवाद साहित्यको विकास गर्ने र नेपाली साहित्यको विश्वव्यापीकरण अभियानमा बिशेष पहल गर्ने
  • साहित्यिक तथा गैर साहित्यिक संस्थाहरुसंग समन्वय गरि साहित्यिक गतिविधिहरु संचालन गर्ने
  • समयानुकूल नयाँ गतिविधिहरु संचालन गर्ने
  • क्षेत्रीय समितिहरुलाई सक्रिय बनाउने र क्षेत्रहरुमा गतिविधि संचालन गर्ने
  • अनेसासको भवन बनाउन बिशेष पहल गर्ने

 
अन्तमा नवनिर्वाचित सबै पदाधिकारीहरुलाई हार्दिक बधाइ ज्ञापन गर्दै सफल कार्यकालको निम्ति हार्दिक शुभकामना दिन चाहन्छु ।

 

पदम विश्वकर्मा,

अध्यक्ष,

अन्तर्राष्ट्रिय नेपाली साहित्य समाज

केन्द्रीय कार्यसमिति

 

 

सेप्टेम्बर ३०, २०१८ (टेक्सास, अमेरिका)

 

Apycom jQuery Menus