अनेसास जापानले मनायो भानु जयन्ती
अन्तर्राष्ट्रिय नेपाली साहित्य समाज (अनेसास) जापान च्याप्टरको भानु जयन्ती विशेष ५८ औँ नियमित साहित्य शृङ्खला भर्चुअल माध्यमबाट मनाएकाे छ ।
संस्थाका अध्यक्ष गिरिजा गैह्रेको सभापतित्वमा सम्पन्न उक्त कार्यक्रममा जापानस्थित नेपाली राजदूतावास प्रमुख महामहिम राजदूत प्रतीभा राणा प्रमुख अतिथि तथा संस्थाका पूर्वअध्यक्ष एवं संरक्षक तथा अनेसास केन्द्रका वर्तमान अध्यक्ष प्रकाश पौडेल ‘माइला' विशिष्ट अतिथिका रूपमा उपस्थित हुनुभएको थियो ।
विशेष अतिथि संस्थाका पूर्वअध्यक्ष आलोक चालिसे रहनुभएको उक्त कार्यक्रममा अनेसास बोर्ड अफ ट्रस्टी सदस्य गृष्मा पौड्याल, अनेसास बोर्ड अफ ट्रस्टी सदस्य एवं अनेसास जापान सल्लाहकार सुष्मा ओमाता, अनेसास जापान सल्लाहकार कुमार सिंखडा, जापानस्थित नेपाली भाषाको विद्यालय एभरेष्ट इन्टरनेशनल स्कूलका प्रधानाध्यपक विष्णु भट्ट र पत्रकार महासंघ जापानका अध्यक्ष मोहन घले अतिथिका रूपमा उपस्थित रहनुभएको थियो ।
यसैगरी अरुण पौडेल, मञ्जु गिरी, सजिना मोक्तान, दिपा घिमिरे, मीनराज बास्तोला, के.बी पारखी, राजेन्द्र पौडेल, अनिलकुमार निर्दोष, मन्जुल मितेरी, अमरदेव बास्तोला, बिन्दा पराजुली बराल, प्रविना बराल, सरिता ढकाललगायतका व्यक्तित्वहरूको कार्यक्रममा सहभागिता रहेको थियो ।
अतिथि तथा कार्यक्रमका सहभागीहरूद्वारा व्यक्त गरिएका शुभकामना मन्तव्य, भानुसम्बन्धी जानकारी तथा विविध सृजनाहरुले कार्यक्रमलाई रोचक र सुन्दर बनाएको थियो । साथै उपस्थित सबै जनाले नेपाली साहित्यका आदिकवि भानुभक्त आचार्यप्रति हार्दिक श्रद्धासुमन अर्पण गर्नुभएको थियो ।
प्रमुख अतिथि राणाले नेपाली भाषा साहित्यको उन्नयनका लागि अनेसासले खेलेको भूमिकाको प्रशंसा गर्दै अनेसास र दूतावासको आत्मीय सम्बन्धबारे प्रकाश पार्दै कोरोनाको यस जटिल परिस्थितिमा दूतावासले खेलिरहेको भूमिकाबारे पनि आफ्नो विचार व्यक्त गर्नुभएको थियो । साथै सबै जनामा आ-आफ्नो ठाउँबाट सकेको काम गर्न र एकताबद्ध रहन पनि अनुरोध उहाँले गर्नुभएको थियो ।
विशिष्ट अतिथि माइलाले सुन्दर कार्यक्रमका लागि धन्यवाद व्यक्त गर्दै अनेसासले खेलिरहेको भूमिकाबारे जानकारी गराउनुभएको थियो ।
अतिथि भट्टले जापानमा नेपाली भाषा, साहित्यको लागि विद्यालयले खेलिरहेको भूमिका र आगामी योजनाहरुबारे विचार व्यक्त गर्नुभएको थियो भने पत्रकार महासंघ जापानका अध्यक्ष घलेले साना-साना चिजहरुले खुसी प्राप्त हुने र सुन्दर जीवनका लागि त्यी चिजहरु महत्त्वपूर्ण रहने भएकाले परदेशमा एक-अर्काप्रति सम्मानसहित सहयात्रा गर्नुपर्ने विचार व्यक्त गर्नुभएको थियो ।
त्यस्तै, उपस्थित अन्य अतिथिज्यूहरुले पनि सान्दर्भिक विचार र शुभकामना सन्देशसहित सुन्दर कार्यक्रमका लागि धन्यवाद व्यक्त गर्नुभएको थियो ।
कार्यक्रमको अन्ततिर संस्थाका कोषाध्यक्ष आनन्द अधिकारीले संस्थाको हालसम्मको आर्थिक प्रतिवेदन सार्वजनिक गर्नुभएको थियो ।
सदा झैँ राष्ट्रिय गानका साथमा सुरुवात गरिएको कार्यक्रममा संस्थाका सदस्य शरद पोख्रेलले कार्यक्रमबारे र भानुकाबारे केही जानकारीसहित स्वागत मन्तव्य राख्नुभएको थियो भने संस्थाका महासचिव रविन शर्माले कार्यक्रम सञ्चालन गर्नुभएको थियो ।
कार्यक्रममा उपस्थित तथा कार्यक्रम हेरेर, सुनेर साथ दिनुहुने सम्पूर्णमा धन्यवादसहित र अनेसास जापानलाई सदा झैँ सबै जनाबाट साथ, सहयोग र माया प्राप्त रहिरहने विश्वाससहित कार्यक्रमका सभापति गैह्रेले अनेसास जापानको भानु जयन्ती विशेष ५८ औँ नियमित साहित्य शृङ्खला समापन भएको घोषणा गर्नुभएको थियो ।
